Sapchuom Thusim

Evangelical Synod Church hung kipat dan chuh 1925-26 kum a,  Milongmun, Henglep Sub-Division, Manipur South mun a Gangte te laka halhthakna hungtunna gah ahi. Gangte pau thawh te cheng lak ahin, 1953 kum in Chiengkawnpang, Churachandpur ah Pu Bawia, Chairman na nuoi leh Rev. K. Thuomngell, Secretary na nuoi ah Khawmpi neih ana hi. Zie khawmpi a thupukna ana siem u chuh, sapchuom min ding in "Evangelical Synod Church" hi mat ding tih ahi. Zie Sapchuom phutdawktute chu - 1. Pastor Bawia - Chairman 2. Mr. Khamthang (Rev. K. Thuomngell) - Secretary 3. Pastor Vangzadal 4. Pastor Khaivung 5. Mr. Lampum.

Evangelical Synod Church hi Biel (Presbyteries) 3 (thum) a khen ana hi, zie haw chu Irang Biel, Saichang Biel leh Phai Biel ahi. Zie Presbyteries 3 (thum) te hin khawmpilien, mipi chenga ding in kumtawp cheng leh neih ding ahi. Zie Kumtawp Khawmpi hi sapchuom ahihloh leh society a dinga kilawihkhawmna lienpen chuh ahi. Zie Kumtawp Khawmpi ahin term khat (kum 4) sunga dingin Executive Committee member dingin ana teldawk sek ui. Zie a Committee member teldawka umte hin Kumtawp Khawmpi memberte thasanga, Sapchuom lam tawh kisai a, apawimawh dungzui a pan a lak dinguh ahi. Executive Committee te'n Thupukna a siemteu haw chuh Kumtawp Khawmpi a thupukna lak zel ding ahi.

A THILTUP HAW:-

  1. Hehpihna nasep (charitable works)
  2. Chanchinpha gen zak (Evangelistic works)
  3. Thiemzilna lam nasep (Educational works)
  4. Kiel panpihna nasep (Relief works)
  5. Mimal, Pawl min, Sapchuom mina sumlepai hawlkhawm (to raise funds)
  6. Huntiem nei a kizilna leh sinsakna nasep (vocational training)
  7. Khawtang hinkhuo dawpsanna nasep (social upliftment)

SUMLEPAI LUTNA:-

Achunga kigensa bangin Sapchuom/Pawlpi hih amah kenga ding ahi. Sumnak haw- sawmakhat, ngamtawk, mimal leh Pawl min leh Tuolsung Sapchuom apata sumlepai hunglut haw chuh Vaihawmna Inpi (Head Office) a sunkhawm vek ahi. Nasep ding abika guon leh munchuoma zilna leh sinsakna bika mat ding haw chuh mi kiphalte leh deihsaktute apat lakkhawm ahi sek hi. Vaihawm pawl (Executive Committee) chuh Sapchuom dang leh Pawlpi chuom chuomte kawma amamawh dungzuia sumlepai muhtheihna dinga lampi leh ahihdan ding ana hawl dinga thuneihna piting piek ahi.

MISSION NASEP/THIEMZILNA:-

Matthai 28:17-19 a thupiek lien Chanchinpha hi thilsiem chitin cheng kawma hehpihna lunggil leh zahngaihna lientak pu a Sapchuom naseppi pena neih ding ahi. Tawhdena umte lunggel leh a thagau lam dinmun uh dawpsan ding. Neilah-chagahte leh guolphalo, piengsuolte atheih china panpih ding. Zie haw ding hin mimal leh a pawl lak apat sumlepai lakkhawm ding, zie haw apat sumlepai umthei taphawt achuh Mission Field Centre, panmun dinga siem ding. Zie thiltup haw puma chuh skul hawiha kai zolo naupangte dinga zilna mun/School guonggalhsak ding. Zie nasem dinga kipumpiek Missionaryte chuh naupangte aman (fee) lalo a hilh dinga namat ding. Mi lunglut leh kipie zo khenkhatte chuh Teacher/hotu dinga thalawh tawmcha pieka gawih ding. Mission Field leh School haw chuh neilah-chagahte ading bika HEHPIHNA NASEPNA (charitable institution) munpi dinga hawn ding ahi. Zie thil guon hi Ginna a mihangsante banga thieng taka Pathien a kinga a, supiting a, malam zuon zel dinga guonggalh ahi.